Tollumba

Tullumbat janë një ëmbëlsirë mjaft e njohur në vendin tonë. Brumi i tullumbave siç është ai i pastës shu është një brum i zier. Këto ëmbëlsira skuqen direkt në vaj të nxehtë e më pas futen në shurup sheqeri. Janë vërtet të shijshme e miqtë tuaj do të mbeten të kënaqur nga ky gatim.

Për 25 copë tullumba

Për brumin :

• 1 gotë miell
• 2-3 lugë gjelle gjalpë
• 4 vezë
• pak kripë
• pak sheqer
• 3/4 gote ujë

Për shurupin ( sherbetin )

• 2 gota sheqer
• 2 gota ujë
• 1 vaj për skuqje

Përgatitja për Tullumbat

Hedhim në një tenxhere ujin, pak kripë, gjalpin dhe pak sheqer. I përziejmë mirë dhe i ngrohim deri sa të vlojë. Pastaj hedhim miellin e situr dhe e përziejmë shpejt me një lugë druri. E lemë në zjarr të ulët duke e përzier gjithmonë derisa të shohim që masa të shkëputet lehtë nga anët e enës dhe nga luga e drurit. Më pas masën e përgatitur e hedhim në një enë qelqi e lemë të ftohet pak deri në 70-80°. Pastaj i shtojmë vezët duke e përzier me kujdes. Vazhdojmë ta përziejmë derisa të arrijmë një masë të trashë në formë kremi dhe pak elastike.

Brumi i përgatitur hidhet në xhep pastiçeri ose shiringë duke i vënë formën e dhëmbëzuar.

Në një tigan hedhim vaj dhe e lemë të nxehët. Fillojmë të hedhim brumin nëpërmjet formës së dhëmbëzuar direkt në vaj të nxehtë. I skuqim mirë nga të dy anët.

Pasi janë skuqur i heqim me kujdes nga vaji dhe i hedhim në shurup të ftohtë ku mbahen përreth 1-2 minuta.

Më pas i nxjerrim dhe i rreshtojmë në pjatë. Pasi janë ftohur komplet i shërbejmë tullumbat.